about-500-coco.png

ʻO ka mahalo. Kau pinepine kēia huaʻōlelo i ka noʻonoʻo i nā lā pau. I ka pō, ma mua o ka hiamoe, helu papa wau i kuʻu mau pōmaikaʻi a pau: ka ʻohana, nā hoaaloha, ka ʻike hou, nā ālaina, ke kūʻonoʻono, a me nā mea hou a pau o ia lā aku. He mahalo.

E like me ka nui poʻe, ua ʻike wau i ka ʻīnea a me nā ālaina o koʻu noho kanaka ʻana. Hoʻomaopopo naʻe au, nui nō hoi ka poʻe nele i ke kākoʻo ʻole, ʻaʻohe o lākou kumu waiwai e puka aku ai mai ia mau paʻakikī. ʻIke leʻa wau i ka pāhewa ʻana o ko kākou "aupuni ʻahahuina kālā", a na kēia ʻike e hoʻoholomua nei iaʻu e paio no ke kaulike noho kanaka.  Inā paha wau i loko o koʻu mau kuleana he hoʻouluulu, luna hoʻoponopono pepa, kākau kānāwai, hoʻopai, a hāʻawi manawaleʻa paha - na ka mahalo e hōʻeu aʻe iaʻu.

 

KA HOʻOILINA ʻOHANA: PAʻU MAU, KAULIKE 

He yonsei wau - he ʻAmelika Kepanī hanauna kuahā.

Ua haʻalele nā kūpuna o koʻu makua kāne iā Iāpana no nā ʻāina mahikō o Kauaʻi. Ua launa koʻu kupuna wahine, ʻo Florence Onishi, me koʻu kupuna kāne, me Robert Iwamoto, ma ka hale ʻaina ʻo Tip-Top, ʻoiai ʻo ia e hana nei he ʻohi kālā. Ua hoʻohana ʻo Robert lāua me Florence i nā kaʻa ʻohana i mea e hoʻokumu ai he pā ʻoihana kaʻa hai, i māhuahua maila a lilo he pā ʻoihana hoʻomākaʻikaʻi a hoʻolimalima kaʻa. Ua hoʻomaka koʻu makua kāne, ʻo Robert ʻŌpio, i ka hana ʻana ma ka ʻoihana ʻohana ma kona wā kula kiʻekiʻe. He holoi kaʻa kāna hana. Ma hope mai, ua lilo ko lākou paʻu like ʻana, ʻo ia ʻo Roberts Hawaiʻi.

about-500-roberts.png

KE KAUA PUNI HONUA II: KA NOHO PIO A ME KA LAWELAWE

ʻO nā kūpuna makuahine. Ua haʻalele lākou iā Iāpana no ka mahi ipu ʻala ma Emepela Awāwa, Kaleponi. I ka wā o ke Kaua Puni Honua II, ua lima ikaika ʻia koʻu makuahine me kona ʻohana pū nō hoʻi i ka noho pio ʻana ma nā kahua pio o Posetona, ʻAlikona. Ua hoʻokuʻu ʻia koʻu mau ʻanakala mai ia kahua pio aku no ke komo ʻana i ka pūʻali koa o ʻAmelika Hui Pū ʻIa. Ma hope mai, ua hoʻokuʻu pau loa ʻia ka ʻohana a ua hoʻi lākou i ka ʻāina mahi ʻai. ʻOiai koʻu makuahine ma ke kula kiʻekiʻe, ua lawelawe koʻu makuahine i ka ʻoihana ʻohana ma ka hana pūkipa.


about-500-siblings.png

KAPA ʻIA NO COCO PALMS

Ma ka lā 25 o Mei, 1968, ua lele mokulele koʻu makuahine mai Honolulu i Līhuʻe ma Kauaʻi no ka leʻaleʻa ʻana ma ka pāʻina a Grace Guslander. He hoʻolauleʻa no ka māhuahua ʻana o kāna Hōkele ʻo Coco Palms. Aia koʻu makuahine ma ka mahina ʻewalu o kona laulau ʻana. I loko pono o ka pāʻina, nahunahu ihola ʻo ia, a hānau mai au i ia lā ma hope mai. Ua kipa ʻoluʻolu mai ʻo Mrs. Guslander. ʻEkolu āna mea i lawe mai ai, he poke pua, he kāleka, a he noi: e kapa iaʻu ʻo Coco, ma muli o kāna hōkele kaulana kauʻāina.


MAʻA I KA HANA

Ma koʻu wā papa ʻelima, ua lawe au i ka nūpepa i koʻu mau hoakaiahome o Waiʻalae Iki. He hana nui ka holo paikikala ma ia kualapa kūnihi. Ma ia manawa pū, ua komo au i ke kōkua manawaleʻa ʻana me koʻu makuahine ma ka Red Cross. Ua hoʻopihapiha wau i nā wahī leka, a pēlā, a pēlā. He aha lā ka mea i pono ai, naʻu nō ia. Ma hope mai, ua lilo au he kākoʻo kahumaʻi kahakaha kanakē ma ka Haukapila ʻo Kapiʻolani.

Iaʻu he ʻōpio, ua lawelawe au i ka ʻoihana ʻohana ma nā kūlana haʻahaʻa like ʻole he nui. Ua holoi au i nā kaʻa hoʻolimalima, ua hoʻokapu au i nā hanana leʻaleʻa a Roberts, a ua hoʻohāinu au ma ka moku kaulua ʻo Aliʻi Kai. Ua hānai ʻia koʻu mau mākua ʻelua i loko o ka lawelawe ʻana ma ia mau ʻoihana ʻohana. Ua maʻa loa lākou i ka hana mai ko lāua wā kamaliʻi nō, pēlā lāua i hānai ai i kā lāua mau keiki.


HELE KULANUI MA NŪ IOKA

ʻAʻole au paipai iki i nā ʻōpio o kēia wā e hana kope mai iaʻu penei, ua noi komo au i hoʻokahi wale nō kulanui, i ka Fashion Institute of Technology (FIT). Aia ma Nū Ioka.  Ua ʻae ʻia wau, a ʻo koʻu neʻe akula nō ia.  Mai laila mai kekahi o kuʻu mau pilina aloha makamae loa e pūlama ʻia nei a hiki i kēia lā nō.

 

PUKA KULANUI MA KAPALAKIKO

Ua loaʻa kaʻu kēkelē A.A mai FIT, a neʻe akula au i Kapalakiko, i mehana mai nā hoʻoilo koʻekoʻe o Nū Ioka. Ma laila, ua lawelawe kūʻai liʻiliʻi au, he hāiki nō hoʻi ka noho ʻana. Ua noho au ma loko o kekahi hōkele kahiko ma ka Tenderloin. Ua ʻike koke au, he pono loa kaʻu kēkelē laepua. Ua walea au i ka papa ʻīkoi Pelekānia ma FIT, no laila, komo akula au i ka Papahana Kākau Hakuhia o Ke Kulanui Mokuʻāina O Kapalakiko.

Ma hope o koʻu puka ʻana i ka makahiki 1990 me ke kēkelē laepua, ua lawelawe au he au pair ma Baselona. Ua hoʻi pōkole i Oʻahu, a neʻe koke aku nō e noho hou ma Nū Ioka.

about-500-newyork.png

KA LAWELAWE ʻANA ME NĀ ʻŌPIO O NŪ IOKA

E konikoni mau ana kuʻu puʻuwai ma ia mau makahiki ʻeono ma hope mai. I mea hoʻohui ʻia me ka hana, ua kōkua lawelawe au ma ke kikowaena kaiāulu a mōakāka mai nā hewa noho kanaka o ka ʻāina.

Ma ke kikowaena kaiāulu, ua hoʻoulu au i nā mākau alakaʻi i loko o ia mau ʻōpio. He ʻilihune loa kekahi o ia mau ʻōpio, ma muli paha o ke kīpeku ʻia mai ka hale aku ma hope o ka hoʻāhuwale wiwo ʻole ʻana i ko lākou ʻano he māhū. Eia ke hoʻomanaʻo nei i hoʻokahi keiki o nā makahiki he 16 wale nō. Wahi āna, hoʻopili maila kona makua kāne i ka palela o ka pū i ke poʻo o ia ʻōpio, me ke kīpeku ʻana iā ia mai ka hale aku. Hāʻawi malū kona makuahine iā ia he pā haneli no ke kikiki kaʻa ʻōhua e holo aku ai mai ia kūlana kauhale liʻili.

Aia i laila koʻu ʻike ʻana i koʻu noho kūʻonoʻono ʻana. ʻAʻole i emi mai koʻu pūʻiwa ʻana, ke ʻike aku au i ka hoʻokae ʻana o kānaka. E aloha ʻia kākou a pau. E mahalo ʻia ko kākou mau mākau hana nui. Aia ma laila ka waiwai o ke kanaka.


about-500-mother.png

HOʻOPANEʻE ʻIA KE KULA LOIO I KA PŌULIA

Ma loko o kaʻu hana me ia mau ʻōpio, ua ulu koʻu makaʻala ʻana i ka hoʻoluʻuluʻu ʻia o kānaka. Ua kiʻi ʻia ke kānāwai he pono hana e hoʻokō aku ai ka poʻe manaʻo ʻino i kā lākou papahana hoʻokaumaha. He nui loa ka hana i koe iaʻu. No laila wau i noi komo ai i ke kula loio.

Ma mua iho o ka hoʻomaka ʻana o ke kula loio ma Nū Mekiko, ua loaʻa ʻino kā koʻu makuahine i ka maʻi huki ma Hawaiʻi. Ua pōʻino loa kona lolo. Ua hoʻopaneʻe au i ke kula loio a hoʻi maila i Hawaiʻi nei e kōkua iā ia. He makahiki paʻakikī loa nō ia, no māua like. ʻAʻole o kana mai koʻu ulu ʻana ma ia wā pōkole.

He 26 oʻu makahiki, naʻu kā hoʻi e mālama i koʻu makuahine aloha. Noʻonoʻo ihola, "Penei nō paha ka nohona o ka makua kūkahi." Ma hope o ka polapola ʻana mai, ua hiki iā ia ke noho me nā kahu mālama no kekahi hapa o ka lā. Kaʻawale aʻe kekahi mau hola no koʻu kōkua manawaleʻa ʻana ma Ka ʻAha Hoʻokolokolo Hoʻopiʻi Kūʻē Mokuʻāina. Ma laila wau i hoʻokāʻoi ai i koʻu mākau noiʻi a me koʻu mākau kākau, i mea hoʻomākaukau no ke kula loio.


KE KULA LOIO MA NŪ MEKIKO

Ma hope o ia makahiki koʻikoʻi, ua neʻe mai hoʻokahi o koʻu mau hoahānau me kona ʻohana pū, na lākou e mālama i koʻu makuahine. Ua neʻe akula au i ʻAlepukaka, Nū Mekiko, ʻo ka hoʻomaka ia o ke kula loio. A pau ka papahana mulipuka, he ʻekolu makahiki, ua loaʻa nui koʻu makuahine i nā maʻi huki. Aia kona mālama ʻia ma ka Hale Hānai ʻO Maunalani.

 


KE KAHU HĀNAI: HE KULEANA KOʻIKOʻI I NĀ ʻŌPIO

Ua maʻa hou mai i ka noho ʻana ma Hawaiʻi, a lilo akula he kahu hānai laikini. E haliʻa ana i nā ʻōpio ʻilihune o Nū Ioka a me ko lākou hana ʻino ʻia, a waiho wale ʻia, a kīpeku ʻia mai ka hale aku no ko lākou ʻano kanaka wale nō. E ʻiʻini ana au e kōkua i ka poʻe ʻōpio o Hawaiʻi o ka pilikia hoʻokahi. Ua hoʻomalu au i kaʻu mau keiki hānai me ke aloha nui a me ke kākoʻo mau. Ua noho wau ma nā hālāwai kīnānā IEP o ke kula, nā hālāwai makua-kumu, a me nā hanana keu ma waho o ke kula.

 


KA PAPA HOʻONAʻAUAO

Ua akāka mai ka nele ʻana o nā keiki he nui i ka ʻelele ʻole ma ka ʻōnaehana hoʻonaʻauao. Ua noho au ma kekahi mau hālāwai Papa Hoʻonaʻauao, a ua kōkua au ma nā kula aupuni o kaʻu mau keiki, i mea e kākoʻo ai. ʻAʻole i liʻuliʻu, ʻo koʻu ʻike ʻana ia, e aho ka hōʻeu ʻana i ka Papa Hoʻonaʻaua O Hawaiʻi me nā kuanaʻike hou a me ke alakaʻi hoʻoholomua ʻana, i waha ʻōlelo no nā keiki o ka ʻāina. No laila wau i holo moho ai he lālā laulā no Oʻahu no ka Papa Hoʻonaʻauao. Noʻu ka hanohano o ka lawelawe ʻana i ia kūlana Papa Hoʻonaʻauao O Hawaiʻi mai ka makahiki 2006 a i ka makahiki 2011.


KA HOʻONAʻAUAO ʻANA

 
  • Ke Kula Kamaliʻi Kalikiano O Kaimukī Kaiāulu
  • Ke Kula Haʻahaʻa ʻO Hōkūlani

  • Ke Kula Haʻahaʻa ʻO Aliʻiolani

  • Ke Kula Haʻahaʻa ʻO Hanahauʻoli

  • Ke Kula Kiʻekiʻe ʻO Kana Lui
  • Fashion Institute of Technology, Nū Ioka, A.A.S 1988

  • Ke Kulanui Mokuʻāina O Kapalakiko, Kaleponi B.A. 1990

  • Ke Kulanui Loio O Nū Mekiko, ʻAlepukaka, J.D. 2000